Каноны Октоиха Господу
Канон Господу нашему Иисусу Христу, глас 4.
Тропарь, глас 4:
Препла́вая пучи́ну настоя́щаго жития́, помышля́ю бе́здну мно́гих мои́х зо́л, и не име́яй окорми́теля помышле́ний, Петро́в провещава́ю Ти́ гла́с: спаси́ мя, Христе́, спаси́ мя, Бо́же, я́ко Человеколю́бец.
Слава: Смире́нную мою́ ду́шу посети́, Го́споди, во гресе́х все́ житие́ ижди́вшую: я́коже блудни́цу приими́ мене́, и спаси́ мя.
И ныне:Стена́ непобеди́мая на́м христиа́ном еси́, Богоро́дице Де́во: к Тебе́ бо прибега́юще невреди́ми пребыва́ем, и па́ки согреша́юще, и́мамы Тя́ Моли́твенницу. Те́м благода́рственно вопие́м Ти́: ра́дуйся, Благода́тная, Госпо́дь с Тобо́ю.
Кано́н покая́нен ко Го́споду на́шему Иису́су Христу́ [его́же краестро́чие: Спаси́ мя, Спа́се, я́коже блу́днаго дре́вле.] Гла́с 4.
Пе́снь 1
Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не, во умерщвле́нии телесе́ побе́дное воспою́ пе́ние.
Припев: Помилуй мя Боже, помилуй мя!
Спа́се мо́й, Иису́се, И́же блу́днаго спасы́й, и и́же блудни́цы пла́ч прие́мый, И́же мытаря́ воздохну́вша, манове́нием свои́м оправда́вый, и мене́ без числа́ согреши́вшаго, и обраща́ющася приими́, и спаси́ мя. (Дважды)
Я́ко ве́щь снеда́ет ду́шу мою́ зло́бный о́гнь, и пла́меню твори́т подгнеще́ние бу́дущему: Человеколю́бче, угаси́ того́, ороше́нием Твои́х ми́лостей, Долготерпели́ве, пода́в ми́ сле́зы покая́ния.
Слава и ныне: Богоро́дичен: Пресве́тлая свеще́ Со́лнца сла́вы, души́ моея́ о́гнь уны́нием угаше́нный возжзи́, Пречи́стая, при́сно Боже́ственных де́л еле́ем напоя́ющи, да ве́рою и любо́вию сла́влю Тя́.
Пе́снь 3
Ирмо́с: С высоты́ снизше́л еси́ во́лею на зе́млю, превы́ше вся́каго нача́ла, и смире́нное возне́сл еси́ из а́да преиспо́дняго естество́ челове́ческое: не́сть бо свя́т па́че Тебе́, Человеколю́бче.
Но́щию мя́ жития́ тьма́ страсте́й объя́ла е́сть, Христе́ Бо́же, све́т сы́й незаходи́мый, луча́ми покая́ния озари́в мя́ спаси́, я́ко Человеколю́бец, да сла́влю Тя́. (Дважды)
Ча́сти мя́ покажи́, Христе́, избра́нных насле́дника, сопроти́вныя ча́сти отлучи́в, Спа́се, слеза́ми и ми́лостынею очище́на, я́ко да во хвале́нии Тя́ сла́влю всегда́.
Слава и ныне: Богоро́дичен: Мари́е Госпоже́, я́ко су́щи все́м Го́спода ро́ждши, облада́ема страстьми́ ума́ моего́, и зло́бою очерне́на, свобо́дна сотвори́ и просвети́.
Седа́льны. Гла́с 4.
Ско́ро совни́дем в неве́стник Христо́в, да вси́ услы́шим Боже́ственный гла́с Христа́ Бо́га на́шего: прииди́те лю́бящии Небе́сную сла́ву, и приими́те сию́ вку́пе с му́дрыми де́вами, просвети́вше свещы́ своя́ ве́рою.
Сла́ва, и ны́не, Богоро́дичен: Е́же от а́нгела сло́во прие́мши, Де́во, во утро́бе Твое́й, и ро́ждши воплоще́нна Христа́ Бо́га Емману́ила, Богоро́дице, моли́ о душа́х на́ших.
Пе́снь 4
Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щыя: сла́ва, Христе́, си́ле Твое́й.
Я́ко судии́ пра́веднейшему ны́не припа́даю Ти́, Го́споди, осужде́нна и отча́яннаго мя́ уще́дри, и пра́веднаго Твоего́ изба́ви изрече́ния, и стоя́ния избра́нных сподо́би. (Дважды)
В разбо́йники впа́дша неукроти́мыя, Человеколю́бче, и уя́звлена бы́вша исцели́, Христе́, возлива́я на мя́ покая́ния вино́ и еле́й и одева́я мя́ оде́ждою спасе́ния моего́.
Слава и ныне: Богоро́дичен: На Тя́ я́коже до́ждь, прему́дрости бе́здна Иису́с сни́де, еди́ну Чи́стую Тебе́ обре́т, Богороди́тельнице Де́во, и загради́ нече́стия пото́ки лю́тыя Боже́ственною благода́тию.
Пе́снь 5
Ирмо́с: Ны́не воста́ну, проро́чески рече́ Бо́г, ны́не просла́влюся, ны́не вознесу́ся, па́дшаго прие́м от Де́вы, и к Све́ту у́мному вознося́й Моего́ Божества́.
О ка́ко осужде́н хощу́ предста́ти Тебе́, Судии́ Бо́гу все́х, и обличе́н бы́ти о все́х злы́х, и́хже без ума́ согреши́х во́лею, и всего́ себе́ непотре́бна сотвори́х! (Дважды)
Спаси́ мя, Го́споди, я́ко зо́л испо́лнихся мно́гих, и молю́ся: исцели́ грехи́ моя́ и гное́ния лю́тая, и не оста́ви поги́бнути мя́ еди́наго, Иису́се мо́й, мно́го Ти́ согреши́вшаго.
Слава и ныне: Богоро́дичен: Твоя́ чудеса́ проро́честии прореко́ша гла́си, го́ру нарица́юще Тя́, Пречи́стая, и две́рь, и свети́льник све́тел: из него́же вои́стинну све́т чу́дный просвеща́ет, Чи́стая, ми́р ве́сь.
Пе́снь 6
Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.
Ме́ртв сы́й не разуме́ю, не чу́вствуя окая́нный, и со́весть оскверне́ну нося́ при́сно: Бо́же Созда́телю мо́й, да не до конца́ погуби́ши мене́. (Дважды)
Дея́ния моя́ я́коже врази́ оклевета́ти мя́ хотя́т на суди́щи твое́м, Ще́дре: от ни́хже ско́ро изба́ви, Христе́, наставля́я мя́ к покая́нию.
Слава и ныне: Богоро́дичен: Омрачи́вшееся се́рдце мое́ те́мными наи́тии греха́, Све́том, и́же в Тебе́, Богоневе́стная, озари́, я́ко со́лнце Христа́ ро́ждшая.
Седален гла́с 4
Невеще́ственными усты́, Тро́ице Пребоже́ственная, непреста́нно пою́т Тя́ безпло́тных ли́цы, и со стра́хом предстоя́т, свя́т, взыва́юще, триипоста́сное естество́: поми́луй ру́к Твои́х созда́ние Твое́, те́х мольба́ми, еди́не Человеколю́бче.
Пе́снь 7
Ирмо́с: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́ Го́споди Бо́же оте́ц на́ших.
Кому́ Тя уподо́блю, душе́ моя́ окая́нная, увы́ мне́, лю́бящую безме́стная, а не до́брая взыску́ющую? Те́мже пре́жде конца́ потщи́ся о́бразы благи́я показа́ти. (Дважды)
Ту́чу ми́, Христе́, сле́з да́ждь, я́ко да от лю́тых мои́х измы́юся, и не оста́ви мене́, Спа́се, ны́не поги́бнути, согреши́вшаго Ти́ мно́го па́че челове́к.
Слава и ныне: Богоро́дичен: Еди́на пребыва́еши по Рождестве́, Влады́чице, де́вственною добро́тою сия́ющи, еди́на ма́терних избе́гла еси́ боле́зней: Бо́га бо еди́на родила́ еси́, изба́вителя ду́ш на́ших.
Пе́снь 8
Ирмо́с: Изба́вителю все́х, Всеси́льне, посреде́ пла́мене благоче́ствовавшыя, снизше́д ороси́л еси́, и научи́л еси́ пе́ти: вся́ дела́ благослови́те, по́йте Го́спода.
Яви́хся ското́м подо́бен безслове́сным, подклони́вся страсте́м. Сло́ве Бо́жий пребезнача́льне, обрати́в мя́, спаси́ вопию́ща: благослови́те вся́ дела́ Госпо́дня Го́спода. (Дважды)
Озоба́ ве́прь, позоба́ еди́нок мя́, Спа́се, я́коже виногра́д возде́ланный ду́хом: от него́же изба́ви мя́, Сло́ве, и плодоно́сна доброде́тельми а́бие Тебе́ покажи́.
Слава и ныне: Богоро́дичен: Благослови́т вся́ тва́рь рождество́ Твое́, благослове́ньми на́с венча́вшее, и от кля́твы изъе́мшее, Всеблагослове́нная еди́на, и препросла́вленная, я́же ро́д на́ш облагода́тившая.
Пе́снь 9
Ирмо́с: Е́ва у́бо неду́гом преслуша́ния кля́тву всели́ла е́сть: ты́ же, Де́во Богоро́дице, прозябе́нием чревоноше́ния, ми́рови благослове́ние процвела́ е́сть: те́м Тя́ вси́ велича́ем.
Се́ покая́ния вре́мя, что́ лени́мся, что́ сно́м погружа́емся? Уны́ния да отсту́пим, украси́м свещы́, я́коже пи́шет, еле́ем благотворе́ния: да не оста́нем внеу́ду двере́й рыда́ющи. (Дважды)
До́ндеже е́сть вре́мя пока́ятися, обрати́ся от зо́л Твои́х, душе́ моя́, я́же соде́ла еси́ ве́дением и неве́дением, и возопи́й к ве́дущему вся́: согреши́х Ти́, прости́ Влады́ко, и не гнуша́йся мене́, недосто́йнаго.
Слава и ныне: Богоро́дичен: От све́та, и́же в Тебе́, Богоневе́сто, заря́ми ду́шу мою́ просвети́, лежа́щую в ро́ве поги́бели возста́ви, враги́ сокруша́ющи, оскорбля́ющыя се́рдце мое́ при́сно, и к страсте́м порева́ющыя мя́.
Молитва
Го́споди Ще́дрый и Ми́лостивый, Долготерпели́ве и Многоми́лостиве, внуши́ моли́тву и вонми́ гла́су моле́ния моего́: сотвори́ со мно́ю зна́мение во бла́го, наста́ви мя на путь Твой, е́же ходи́ти во и́стине Твоей, возвесели́ се́рдце мое́, во е́же боя́тися и́мене Твоего́ Свята́го, зане́же ве́лий еси́, и творя́й чудеса́. Ты еси́ Бог Еди́н, и несть подо́бен Тебе́ в бозе́х, Го́споди, Си́льный в ми́лости, и Благи́й в кре́пости, во е́же помога́ти и утеша́ти, и спаса́ти вся упова́ющыя на и́мя Твое, Отца и Сы́на и Свята́го Ду́ха, ны́не и при́сно, и во ве́ки веко́в, аминь.
![Каноны Господу Каноны Господу](gospodu.jpg)